Dari Kompor Minyak (Minyak Tanah) ke Kompor Gas (Elpiji 3 kg)

Tak terasa so 6 bulan nda ba tulis di blog. Mulai dari alasan sibuk, bingo mo tulis tentang apa sampe lupa kalo so ada blog sandiri, hehehehehe. Jadi pas kondisi sekarang ini orang Manado stenga mati mo cari minyak tanah, akhirnya jadi sumber inspirasi for mo ba tulis ulang di blog.
Beberapa minggu terakhir ini, so lebe susah kasing ini orang Manado mo cari minyak tanah. Kalaupun dapa pasti musti buang banyak tenaga karena musti antri sampe berjam-jam di pangkalan minyak tanah (biar panas, ujang sampe somu-somu tetap antri supaya itu dapur tetap ba asap). Laeng kali tre, so antri pe lama serta so dekat itu antrian, minyak tanah so abis. Mar mo bagemana??? itulah yang terjadi sekarang!!!
Mulai Pemerintah kase kaluar kebijakan kalu minyak tanah mo ganti dengan elpiji 3 kg, itu minyak tanah so lebe susah mo dapa. kalaupun  mo dapa di warong depe harga so lebe mahal dari itu harga pangkalan, bahkan skarang so ada yang jaga jual sampe Rp, 10.000,-/liter padahal depe harga pangkalan cuma Rp. 3.000,-/liter.
Timbul pertanyaan, kyapa so Pemerintah mo ganti itu Minyak Tanah dengan gas Elpiji 3 kg??? ada beberapa alasan yang pemerintah bilang:

1. Itu subsidi minyak so banyak sekali APBN jaga tanggung, jadi kalu itu subsidi for minyak so cabu, itu dana APBN yang selama ini dipakai untuk subsidi minyak so boleh kase langsung for orang miskin.
2. Dengan subsidi minyak ditarik dan diganti dengan gas elpiji 3 kg, sebenarnya membantu orang miskin karena "katanya" gas elpiji 3 kg, jaoh lebe murah dibandingkan dengan minyak tanah.
3. Dan masih ada alasan laeng tantu noch......

Kong muncul pertanyaan lech, kyapa ini orang Manado masih tako pake ini elpiji 3 kg????
Ada beberapa alasan lagi, kyapa sampe ini orang Manado masih banyak yang blum suka mo beralih ke elpiji 3 kg:

1. Tako jang sampe itu elpiji 3 kg mo polote alias meledak. Ini lantarang sebelumnya di daerah Jawa sebelumnya ini elpiji 3 kg ini so banyak yang polote kong banyak yang jadi korban, mulai dari harta benda sampe itu nyawa so malayang. Jadi nyanda heran itu orang Manado masih tako mo pake itu elpiji 3 kg.
2. Masih banyak yang blum tau pake itu gas elpiji 3 kg lantarang masih kurang sosialisasi. Deng itu tampa bajual elpiji 3 kg masih sadiki, jadi masih susah mo dapa. Coba torang banyangkan kalo sementara teru nasi kong kage itu gas abis, kong musti pigi bli di tampa jaoh, mo jadi apa itu nasi ada teru. ato skarang so mo dekat Natal deng Taong Baru, orang2 Manado so mo ba bekeng kukis, coba bayangkan sementara babakar kukis, kong itu gas elpiji abis........!!!!!!
3. Deng masih banyak lagi itu alasan laeng....

Jadi, kalo Pemerintah butul-butul mo bekeng itu program gas Elpiji 3 kg, musti pikir bae-bae kong so butul-butul siap baru dijalankan, termasuk depe sosialisasi deng pendekatan pa masyarakat kecil, supaya itu program boleh didukung kong berhasil.