Manado bebas macet (Kapan yach???)

samua orang Manado rindu, torang pe kota Manado tantu bebas macet/taprop. Mar ini macet juga tanda bagus, berarti orang Manado so lebe tinggi depe tingkat pendapatan, jadi so bole ada oto deng motor. (biar laeng cuma kredit, hehehehe! biar kredit yang penting ada!!!!)
Kita ley sebagai orang Manado, suka ini Manado nyanda mo macet-macet. Pa kita pe otak ada beberapa ide/usul yang mudah-mudahan boleh bekeng ini Manado bebas macet.
Mar skali lagi kita mo kase inga, ini cuma pendapat pribagi, jadi jang marah
kalu nyanda sadap di hati deng pikiran pa ngoni, ambe jo yang sadap-sadap noch, hehehehehe!.
Ini itu kita pe ide :
1). Itu pajak kendaraan bekeng progresif. kita pe maksud itu pajak for oto deng motor tiap 5 taon kase nae. kyapa 5 taon??? lantaran itu STNK tiap 5 taon musti bekeng ulang to??? jadi misalnya 5 taon pertama, depe pajak 10%, maka 5 taon kadua kase nae jadi 15%, 5 taon katiga kase nae jadi 20% dst. kalo pajak model bagini, orang akan lebe banyak pake oto ato motor baru daripada seken. karena for orang banya doi, dorang ada yang sampe 3 bahkan 5 oto satu rumah, tiap ada oto model baru kaluar dorang jual dorang pe oto lama (padahal mungkin baru satu taon itu oto lama) kong bili oto baru, so jelas lebe banya oto di Manado berarti ini Manado pe beban so mo lebe banya, maka akhirnya MACET! Selain itu, pajak berarti nae, berarti pendapatan daerah nae, jadi itu sarana infrastruktur di Manado (jalan, jembatan) so mo lebe bagus.
2). Bekeng capat klar itu jembatan Soekarno, supaya so ada jalan alternatif.
3). Aturan tentang tempat usaha harus memiliki tempat parkir musti jelas deng tegas. kalu bulum ada susun jo noch. Jadi kalu ada tempat usaha baru mo badiri, musti ada tampa parkir dulu baru kase kaluar depe ijin, kalo perlu musti ada depe rumus, misalnya kalu usaha kecil depe luas tampa parkir brapa, dst. kalu yang so lama, kase waktu pa dorang for bekeng tampa parkir, kalu so lewat depe waktu kong nyanda ada tampa parkir, cabu jo depe ijin.
4). Itu jalur lambat deng jalur capat musti kase jelas ulang. Apalagi di daerah satu jalur, jalur lambat sebelah kiri jalur capat sebelah kanan ato bagemana musti kase jelas ulang, kong kalo jalur cepat barapa depe kecepatan maksimal.
5). Bekeng jalan layang. cuma katu mahal kang kalu mo bekeng jalan layang, tapi ini tetap musti dipikirkan. kan kalo so ada jalan layang, Manado so mo lebe keren dapa lia kang, hehehehe!.
6). Di daerah perbatasan masuk kota Manado, bekeng tampa parkir. Jadi itu oto-oto pribadi dari daerah luar kota, kase parkir jo disana, kong suru nae mikro ato bis pa dorang. kan lumayan???? daerah tatamba pendapatan dari tampa parkir, nyanda banya oto maso Manado, jadi nda macet, kong sopir-sopir boleh dapa lebe banya panumpang. kalo sopir pe pendapatan meningkat, berarti dorang pe tingkat konsumsi boleh lebe tinggi ato dorang pe tabungan boleh mo batambah, jadi ini masyarakat Manado yang golongan menengah ke bawah akan semakin sejahtera.
7). Kalo boleh bekeng batasan punya oto. Maksudnya satu keluarga maksimal 2 oto misalnya (tantu ini for orang-orang kaya). soalnya kita lia skarang ini orang-orang kaya di Manado, ada satu keluarga ada 3 sampe 5 oto ato bahkan lebe. jadi kalu dorang pe oto banya, kalu dorang kaluar satu orang bawa satu oto, padahal itu oto boleh mo tampung 5 sampe 7 orang. so pasti kalu dorang kaluar satu orang bawa satu oto, mo lebe banya oto di jalan yang berarti mo macet noch!!!! mar ini pasti orang-orang kaya mo marah, lantarang itu katu dorang pe doi jadi dorang mo bli samua itu merek oto yang ada dorang pe hak. mar itu noch, pasti kemungkinan mo macet tatambah. blum lagi tingkat kesenjangan sosial so mo lebe kantara, jadi itu tingkat kejahatan le mo nae itu berarti ini torang pe kota Manado so mo nyanda aman deng nyaman.
8). Perbanyak jalan alternatif. Jadi kalu skarang jalan boulevard deng samrat so satu arah, itu jalan-jalan penghubung (itu lorong-lorong) jalan boulevard deng samrat musti buka, supaya itu oto (oto pribadi deng mikro) deng motor lebe banyak jalan alternatif.

Itu cuma kita pe pendapat pribadi, dan kita yakin masing-masing orang punya impian tentang kota Manado ke depan dan bagemana mo bekeng ini kota Manado mo jadi lebe bagus. Jadi pro kontra pasti ada. jadi kita minta maaf (sorry bro/sis)kalu kita pe ide ini nyanda maso akal, agak ekstrim ato bahkan mungkin ini ide gila. Namanya juga ide!!! deng bulum pasti dorang mo dengar deng bekeng, tapi apapun ide/usul yang diberikan oleh siapupun (termasuk kita pe ide skarang, hehehehe!!!!! mar jang paksa noch!!!) torang musti dukung selama itu ingin menjadikan Manado menjadi
lebe maju deng terutama masyarakat kota Manado menjadi lebe sejahtera tentunya.
oi to po!!!!!!
Tuhan memberkati kita semua. Amin!!!